Мудофаа вазирлигида янги тайинловлар амалга оширилди
Баҳром Ўрмонов мудофаа вазирининг рақамлаштириш ва киберхавфсизлик бўйича ўринбосари этиб тайинланди.
Президентнинг 12 май кунги тегишли қарор ва фармойишига мувофиқ, Мудофаа вазирлиги тизимида янги тайинловлар амалга оширилди. Бу ҳақда вазирлик ахборот хизмати маълум қилди.
Унга кўра, полковник Баҳром Ўрмонов мудофаа вазирининг рақамлаштириш, сунъий интеллект ва киберхавфсизлик бўйича ўринбосари лавозимига тайинланди.
Қайд этилишича, Баҳром Ўрмонов ушбу тайинловга қадар Қуролли Кучлар Бош штабининг Алоқа, ахборот технологиялари ва ахборотларни ҳимоялаш бош бошқармаси бошлиғи лавозимида фаолият юритган.
Шунингдек, полковник Мирсаид Шукуров Жануби-ғарбий махсус ҳарбий округ таркибидаги Жанубий оператив қўмондонлик бошлиғи лавозимига тайинланди.
