Сурия Президенти акаларини юқори лавозимлардан бўшатди
Лекин улардан бири Россияга элчи этиб тайинланиши мумкин.
Сурия президенти Аҳмад аш-Шараъа ҳукуматдаги кадрлар алмашинуви доирасида икки акаси — Маҳер ва Ҳазем аш-Шараъани юқори лавозимлардан четлатди. Бу ҳақда президентга яқин манбага таяниб i24NEWS хабар берди.
Манбага кўра, мазкур ўзгаришлар ҳукумат фаолиятини янгилаш ва сурияликлар ишончини қайта тиклашга қаратилган сиёсий ўзгариш доирасида амалга оширилган.
Маҳер аш-Шараъа шу пайтгача Сурия президенти администрацияси бош котиби лавозимида ишлаб келган. Эндиликда унинг ўрнини Ҳомс вилоятининг собиқ губернатори Абдулраҳмон ал-Аама эгаллаган.
Хабарда айтилишича, Маҳер аш-Шараъа Дамашқ ва Москва ўртасидаги алоқаларда муҳим фигурага айланган. Бунга унинг рус тилини билиши ва рафиқаси россиялик экани сабаб бўлгани қайд этилган.
Президентга яқин манба Маҳер аш-Шараъанинг Россияга элчи этиб тайинланиши эҳтимоли юқори эканини билдирган.
Президентнинг яна бир акаси Ҳазем аш-Шараъа ҳам лавозимини тарк этган. У Иқтисодий тараққиёт бўйича олий кенгаш витсе-президенти сифатида фаолият юритган.
Маълумотларга кўра, ака-укаларнинг лавозимдан олиниши аввалдан муҳокама қилинаётган эди. Ўтган ой уларнинг отаси, иқтисодий шарҳловчи Ҳусайн аш-Шараъа Маҳер ва Ҳазем давлатдаги фаолиятини “тоза қўллар ва яхши обрў билан” якунлашини таъкидлаган.
i24NEWS'нинг ёзишича, кадрлар алмашинуви Сурияда ҳокимият тизимини қайта шакллантириш ва ички ишончни мустаҳкамлашга қаратилган кенгроқ жараённинг бир қисми сифатида кўрилмоқда.
