Украина президенти офисининг собиқ раҳбари пул ювишда айбланмоқда
Андрей Ермак элита турар жой лойиҳаси орқали 10 миллион доллардан ортиқ маблағни легаллаштиришда гумон қилинмоқда.
Украина ҳукумати президент Володимир Зеленскийнинг собиқ аппарат раҳбари Андрей Ермакни йирик коррупция ва пул ювиш иши бўйича гумонланувчи сифатида эълон қилди, дея хабар бермоқда Reuters.
Украинанинг коррупцияга қарши курашувчи идоралари маълумотига кўра, Ермак Киев яқинидаги элита тураржой мажмуаси орқали тахминан 10,5 миллион доллар маблағни легаллаштириш билан боғлиқ жиноий схемада иштирок этганликда гумон қилинмоқда.
Қонунчилик талабларига мувофиқ расмий баёнотда гумонланувчи номи очиқланмаган. Бироқ маҳаллий ОАВлар гап айнан Ермак ҳақида кетаётганини ёзди.
Ермак Озодлик Радиосига берган изоҳида мазкур тураржой мажмуасида кўчмас мулкка эгалик қилмаслигини билдирган, бироқ бошқа тафсилотларга изоҳ бермаган.
Мазкур иш ўтган йил ноябрида бошланган кенг кўламли коррупция терговининг бир қисми ҳисобланади. Ўшанда Зеленскийнинг собиқ бизнес ҳамкори давлат атом агентлигида 100 миллион долларлик “откат” схемасини ташкил этганликда айбланганди.
Тергов доирасида Украинанинг собиқ бош вазир ўринбосари ҳам айбловга тортилган.
Президентнинг коммуникациялар бўйича маслаҳатчиси Дмитро Литвиннинг айтишича, Ермакка нисбатан билдирилган гумон бўйича процессуал ҳаракатлар ҳали давом этмоқда ва ҳозирча якуний хулоса чиқаришга эрта.
Сиёсий доираларда Ермак узоқ вақт давомида Зеленскийдан кейинги энг таъсирли шахслардан бири сифатида кўрилган. Собиқ кино продюсери ва юрист бўлган Ермак АҚШ воситачилигидаги Россия-Украина музокараларида ҳам Киевнинг бош музокарачиларидан бири эди.
У 2025 йилда президент администрациясига нисбатан ишончни тиклаш мақсадида амалга оширилган ҳукуматдаги ўзгаришлар фонида лавозимини тарк этган эди.
