Солиқ қўмитаси картадан-картага ўтказмаларни текширишни бошлади

Ўзбекистонда солиқ органлари  айрим тадбиркорларнинг P2P ўтказмаларини таҳлил қилишни бошлади. Бу ҳақда Солиқ қўмитаси хабар берди.

 

Маълум қилинишича, савдо фаолияти билан шуғулланувчи айрим хўжалик юритувчи субъектларда савдо амалиётлари пластик картадан пластик картага (P2P) пул ўтказмалари орқали амалга оширилаётгани аниқланмоқда.

 

Aйрим ҳолларда бундай ўтказмалар орқали тушган даромадлар солиқ ҳисоботларида акс эттирилмаяпти. Натижада давлат бюджетига тушиши лозим бўлган маблағлар тўлиқ шаклланмай қолмоқда.

 

Шу муносабат билан солиқ органлари юридик шахсларда фаолият юритувчи раҳбар ходимларнинг банк пластик карталарига келиб тушган маблағлар юзасидан таҳлилий ўрганишлар олиб бормоқда. 

 

Аниқланган ҳолатлар асосида ҳисоботларда кўрсатилмаган даромадлар бўйича тегишли чоралар кўрилаётгани ва солиқ тўловчиларга хабарномалар юборилаётгани билдирилди.

 

Солиқ қўмитаси бу жараён жазолаш ёки босим ўтказиш эмас, аксинча иқтисодий адолатни таъминлаш, яширин айланмаларни қисқартириш ҳамда қонуний фаолият юритаётган тадбиркорларни қўллаб-қувватлашга қаратилганини таъкидлади.

 

Шунингдек, тадбиркорлик субъектлари савдо тушумларини тўлиқ расмийлаштиришга ва уларни солиқ ҳисоботларида ҳаққоний акс эттиришга чақирилди.

 

Аввалроқ Марказий банк томонидан молиявий операциялар устидан назоратни кучайтиришга қаратилган янги тартиблар тасдиқлангани ҳақда хабар берилганди. Унга кўра, мамлакатдаги банклар айрим йирик ва шубҳали деб топилган транзаксияларни кучайтирилган мониторинг асосида кузатиб боради.