АҚШ Сенати Эрон билан урушни тўхтатиш резолюциясини яна рад этди

 

АҚШ Сенати Эрон билан ҳарбий можарони тугатишга қаратилган резолюцияни яна рад этди. Сенатдаги овоз бериш якунларига кўра, ҳужжатни 49 нафар сенатор қўллаб-қувватлаган бўлса, 50 нафари унга қарши овоз берган. Шу тариқа мазкур ташаббус Сенатда кетма-кет еттинчи маротаба қабул қилинмай қолди деб хабар беради ТАСС.

Резолюция АҚШ маъмуриятини Эронга қарши ҳарбий ҳаракатларни тўхтатишга чақиришни назарда тутган. Уни қўллаб-қувватлаган сенаторлар орасида Республикачилар партиясининг уч вакили — Ренд Пол, Лиза Мурковски ва Сюзан Коллинз ҳам бўлган. Демократлар орасида эса Пенсилвания штати сенатори Жон Феттерман ҳужжатга қарши овоз берган ягона сенатор сифатида қайд этилган.

АҚШ ва Эрон ўртасидаги кескинлик сўнгги ойларда янада кучайган. АҚШ ва Исроилнинг Эронга қарши ҳарбий амалиётлари ортидан минтақадаги хавфсизлик вазияти мураккаблашган. Томонлар ўртасида вақтинчалик сулҳ эълон қилинганига қарамай, узоқ муддатли келишувга эришиш бўйича музокаралар ҳозирча натижа бермаган.

АҚШ президенти Доналд Трамп аввалроқ Эрон билан икки ҳафталик сулҳ режими жорий этилганини маълум қилган эди. Кейинчалик Вашингтон сулҳ муддатини узайтириш ниятини билдирган. Бироқ Эрон томони АҚШнинг бир томонлама қарорларини тан олмаслигини ва ўз манфаатлари асосида ҳаракат қилишини маълум қилган.

Шунингдек, АҚШ маъмурияти май ойида Конгресс раҳбариятига Эрон билан уруш якунланган деб ҳисобланаётгани ҳақида расман ахборот юборган эди.

Эрон томони эса мамлакат ҳудудига уюштирилган ҳужумлар оқибатида минглаб одамлар ҳалок бўлганини билдирган.