Республика бўйлаб 12 кунда болаларни меъёрдан ортиқ ташиш билан боғлиқ 170 та ҳолат аниқланди

 

Ўзбекистонда мактабгача ёшдаги болаларни транспорт воситаларида хавфсиз ташиш қоидаларини бузиш ҳолатлари давом этмоқда. Йўл ҳаракати хавфсизлиги хизмати томонидан ўтказилган назорат тадбирларида болаларни белгиланган меъёрлардан ортиқ ва хавфли тарзда ташиш билан боғлиқ кўплаб ҳолатлар аниқланган.

Йўл ҳаракати хавфсизлигининг маълум қилишича, 1–12 май кунлари давомида республика бўйлаб ўтказилган текширувларда 170 та қоидабузарлик қайд этилган. Ушбу ҳолатларда жами 3872 нафар бола сиғимидан ортиқ юкланган транспорт воситаларида олиб кетилаётгани аниқланган.

Хусусан, Сирдарёда ҳайдовчилик гувоҳномасига эга бўлмаган шахс Damas автомобилида 23 нафар болани ташиётгани маълум бўлган. Наманганда ҳам ҳуқуқий рухсатсиз ҳайдовчи 18 нафар болани олиб кетаётган вақтида тўхтатилган. Бухорода эса 40 нафар болани ташиётган автобус ҳайдовчисининг маст ҳолатда экани аниқланган.

Мутасаддилар болаларни ташишда хавфсизлик талабларига қатъий риоя қилиш зарурлигини эслатиб, йўловчилар сонини белгиланган меъёрдан ошириш тақиқланишини таъкидлаган. Шунингдек, болалар гуруҳларини ташишда махсус “Болалар ташиш” белгиси бўлиши ва вояга етган кузатувчилар ҳамроҳлиги таъминланиши лозимлиги қайд этилган.