Россияда 200 дан ортиқ ўзбекистонликни ноқонуний қонунийлаштирган гуруҳ фош этилди
Ноқонуний схемага 45 ёшли Ўзбекистон фуқароси раҳбарлик қилган.
Россиянинг Воронеж вилоятида Ўзбекистон фуқароларининг ноқонуний миграциясини ташкил этиш билан шуғулланган жиноий гуруҳ фаолиятига чек қўйилди. Бу ҳақда Россия Ички ишлар вазирлигининг Воронеж вилояти бўйича бош бошқармаси маълум қилди.
Дастлабки маълумотларга кўра, ноқонуний схемага 45 ёшли Ўзбекистон фуқароси раҳбарлик қилган. У уч нафар маҳаллий аҳолини — 56 ёшли аёл, 44 ёшли эркак ҳамда 73 ёшли нафақахўрни ушбу фаолиятга жалб қилган.
Тергов маълумотларига кўра, гуруҳ 2024 йил июнь ойидан буён фаолият юритиб келган. Улар пул эвазига Ўзбекистондан келган мигрантлар учун сохта рўйхатдан ўтказиш ҳужжатлари, шунингдек, рус тили, Россия тарихи ва қонунчилиги бўйича имтиҳонлардан ўтгани ҳақидаги қалбаки сертификатларни тайёрлаб берган.
Ҳуқуқ-тартибот органлари маълумотига кўра, ушбу схема орқали 200 дан ортиқ Ўзбекистон фуқароси Россияда ноқонуний равишда қонунийлаштирилган.
Тинтувлар давомида компьютер техникалари, планшет ва ноутбуклар, мобил телефонлар, банк карталари, тижорат муҳрлари, мигрантларга тегишли паспортлар ҳамда мингдан ортиқ миграцион ҳужжатлар нусхалари мусодара қилинган.
Мазкур ҳолат юзасидан Россия Жиноят кодексининг ноқонуний миграцияни ташкил этиш билан боғлиқ моддаси асосида жиноят иши қўзғатилган. Гуруҳ раҳбари ҳибсга олинган, қолган гумонланувчиларга нисбатан эҳтиёт чораси қўлланган.
Ҳозирда тергов ҳаракатлари давом эттирилмоқда.
