Инсоният янги иқлим фалокати хавфи остида қолиши мумкин

Олимлар XIX асрда ўнлаб миллионлаб одамларнинг ўлимига сабаб бўлган кучли “Эл Нино” иқлим циклининг яна такрорланиш эҳтимолидан огоҳлантирмоқда. Бу ҳақда The Washington Post хабар берди.

 

 

“Эл Нино” — Тинч океанининг тропик шарқий ва марказий қисмида сув ҳароратининг кескин исиши билан боғлиқ иқлим ҳодисаси бўлиб, у ҳар бир неча йилда кузатилади. Мутахассислар фикрича, бу йил океан ҳарорати меъёрдан 3 даражагача юқори бўлиши ва янги рекордларни ўрнатиши мумкин.

 

Нашр эслатишича, 1877–1878 йилларда кузатилган энг кучли “Эл Нино” Ҳиндистон, Хитой, Бразилия ва бошқа давлатларда глобал очарчиликка сабаб бўлган. Тадқиқотларга кўра, ўша даврда 50 миллиондан ортиқ одам ҳалок бўлган. Бу ўша пайтдаги дунё аҳолисининг тахминан 3–4 фоизига тенг эди. Ҳозирда бу кўрсаткич 250 миллион кишига тўғри келади.

 

Олимлар шунга ўхшаш иқлим инқирози ҳозир ҳам такрорланиши мумкинлигини истисно қилмаяпти. Вашингтон давлат университети доценти Дипти Синхнинг таъкидлашича, 1870 йиллардаги каби бир вақтнинг ўзида бир неча минтақада кўп йиллик қурғоқчиликлар кузатилиши эҳтимоли мавжуд.

 

Унинг сўзларига кўра, ҳозир атмосфера ва океанлар XIX асрдагидан анча иссиқроқ бўлгани учун экстремал об-ҳаво ҳодисалари янада кучли кечиши мумкин.

 

Мутахассислар “супер Эл Нино” озиқ-овқат хавфсизлиги, сув таъминоти ва жаҳон иқтисодиётига жиддий таҳдид солиши мумкинлигидан огоҳлантирмоқда. Уларнинг фикрича, бу глобал ижтимоий-иқтисодий тизимларга ҳам салбий таъсир кўрсатиши мумкин.