“Сеҳрли чапақай”: Спорт ва оилавий қадриятлар ҳақида янги фильм
Фильм ёшларни ватанпарварлик, қатъият ва соғлом турмуш тарзига руҳлантиришни мақсад қилган.
15 май куни “Ренессанс кино уйи”да “Сеҳрли чапақай” бадиий фильмининг ёпиқ намойиши бўлиб ўтди. Тадбир Кинематография агентлиги, Президент Администрацияси ҳузуридаги Оммавий ахборот воситалари учун контент тайёрлаш маркази, “Your Films Entertainment”, ЎФФ ҳамда Республика Маънавият ва маърифат маркази ҳамкорлигида ташкил этилди.
Фильм спорт, оила ва жамият қадриятларини акс эттирувчи ҳаётий воқеалар асосида суратга олинган бўлиб, томошабинга руҳий мотивация, ишонч ва ғалабага интилиш ҳиссини улашади.
Шунингдек, картинада фарзандларни уларнинг қобилиятидан келиб чиқиб касбга йўналтириш ва бу йўлда уларни қўллаб-қувватлаш ғояси ҳам илгари сурилади.
Фильм сюжети ота ва бола ўртасидаги муносабатлар, она меҳри, тарбия, дўстлик ҳамда жамоа руҳига қурилган. Воқеалар давомида бош қаҳрамоннинг мураккаб ҳаёт йўли, спортдаги синовлари, мағлубият ва умидсизликларга қарши кураши, шунингдек, қатъият билан мақсад сари интилиши драматик тарзда ёритилади.
Таъкидланишича, “Сеҳрли чапақай” фақат спорт ҳақида эмас, балки инсонийлик, ҳалоллик, адолат ва кучли ирода ҳақида ҳикоя қилувчи фильм ҳисобланади. Картина марказида фарзанди камоли учун курашадиган ота образи орқали чуқур ҳаётий ибрат ғояси илгари сурилган.
Фильм ёшларни ватанпарварлик, қатъият ва соғлом турмуш тарзига руҳлантиришни мақсад қилган. Шу билан бирга, унда мамлакатда спорт соҳасида олиб борилаётган ислоҳотлар, яратилаётган имкониятлар ва уларнинг амалий натижалари ҳам кенг жамоатчиликка намойиш этилади.
Фильм сценарийси муаллифи ва режиссёри — Ҳабибуллоҳ Ҳайдар. Продюсер — Фозил Юнусов. Асосий ролларни Сирожиддин Сатторов, Муҳаммад Нурмуҳаммадов, Тоҳир Саидов, Шаҳло Темирова, Ўлмас Темур, Ардашер Абдулҳаев ўғли ҳамда Мурод Насимов ижро этган.
Абдуллаева Шахризода
