Трамп “дунёдаги энг фаол террорчилардан бири” йўқ қилинганини эълон қилди
ИШИД етакчиси Абу Билол ал-Майнуқий АҚШ ва Нигерия ҳарбийлари ўртасида қўшма операция натижасида йўқ қилинган.
АҚШ президенти Доналд Трамп Африкада фаолият юритган ИШИД етакчиларидан бири Абу Билол ал-Майнуқий йўқ қилинганини маълум қилди. У бу ҳақда ўзининг Truth Social ижтимоий тармоғидаги саҳифасида ёзган.
Трампнинг баёнотига кўра, АҚШ ва Нигерия қуролли кучлари ҳамкорлигида ўтказилган махсус ва пухта режалаштирилган операция давомида “дунёдаги энг фаол террорчилардан бири” жанг майдонидан чиқариб ташланган.
АҚШ президенти ушбу операция олдиндан аниқ разведка маълумотлари асосида амалга оширилганини қайд этиб, Америка томонига Африкадаги террористик гуруҳлар фаолияти бўйича доимий маълумот етказиб борилганини таъкидлади.
Унинг сўзларига кўра, ал-Майнуқий йўқ қилингач, ИШИДнинг Африкадаги фаолиятида сезиларли заифлашув кузатилган.
Шунингдек, Доналд Трамп Нигерия ҳукумати ва қуролли кучларига ушбу операцияни амалга оширишдаги ҳамкорлик учун миннатдорлик билдирди.
