Ўзбекистон Марказий Осиёда сув истеъмоли бўйича етакчиликни сақлаб қолмоқда
Кейинги ўринларни Туркманистон, Қозоғистон, Тожикистон, Қирғизистон эгаллаган.
Марказий Осиёда сув ресурсларига босим ортиб бораётган бир шароитда Ўзбекистон йиллик 54,56 млрд куб метр кўрсаткич билан минтақада энг юқори умумий сув истеъмолига эга давлат сифатида қайд этилди. Бу ҳақда Worldometer таҳлилий платформаси эълон қилди.
Маълумотларга кўра, Ўзбекистон минтақа давлатлари орасида умумий сув сарфи бўйича биринчи ўринни эгаллаб турибди. Мутахассислар бу ҳолатни асосан қишлоқ хўжалигининг кенг кўламда ривожлангани ва ирригация тизимларининг юқори даражадаги сув истеъмоли билан изоҳламоқда.
Рейтингда иккинчи ўринда Туркманистон қайд этилган бўлиб, йиллик сув истеъмоли 27,9 млрд куб метрни ташкил этади. Қозоғистонда бу кўрсаткич 22,77 млрд куб метр, Тожикистонда 11,49 млрд куб метр, Қирғизистонда эса қарийб 8 млрд куб метрга тенг.
Аҳоли жон бошига ҳисобланганда эса минтақада энг юқори кўрсаткич Туркманистонга тўғри келади — бир киши кунига ўртача 15 445 литр сув истеъмол қилади.
Ўзбекистонда бу кўрсаткич 4 778 литрни ташкил этади. Тожикистонда 4 460 литр, Қирғизистонда 4 153 литр, Қозоғистонда эса 3 397 литр қайд этилган.
Мутахассислар фикрича, ушбу рақамлар минтақа давлатлари олдида сув ресурсларидан самарали фойдаланиш, замонавий бошқарув тизимларини жорий этиш ҳамда қишлоқ хўжалигини модернизация қилиш бўйича долзарб вазифаларни қўймоқда.
