Андижонда ноқонуний дори ишлаб чиқарувчи яширин cех фош этилди
Тезкор тадбир давомида 100 турдаги 500 мингдан ортиқ тайёр маҳсулот ашёвий далил сифатида олинган.
Божхона қўмита матбуот хизматининг маълум қилишича, Андижон вилояти божхона бошқармасининг Контрабандага қарши курашиш бўлими ҳамда Давлат хавфсизлик хизмати вилоят бошқармаси ҳамкорлигида ўтказилган тезкор тадбир давомида ноқонуний лаборатория аниқланган.
Дастлабки маълумотларга кўра, Андижон шаҳридаги манзиллардан бирида фаолият юритган 4 та юридик шахс “озиқ-овқат маҳсулотлари учун кимёвий қўшимчалар” ишлаб чиқариш ниқоби остида сифати кафолатланмаган дори воситалари ва биологик фаол қўшимчаларни ноқонуний равишда тайёрлаб келган.
Текширув давомида яширин цехда аҳоли орасида кенг тарқалган «Витамих», «Гегси», «Феррумфер», “Winds Baby”, «Лювит», «Ёдовит», «Геппорооз», «Бифидолин» ва «Ёдоплюс» каби жами 100 турдаги маҳсулот ишлаб чиқарилгани аниқланган.
Қайд этилишича, ушбу маҳсулотлар орасида болалар учун мўлжалланган сироплар, оғриқ қолдирувчи воситалар, бўғим ва тери касалликларига қарши препаратлар, қон кўпайтирувчи воситалар, турли шамчалар ҳамда махсус чойлар ҳам мавжуд бўлган.
Тезкор тадбир давомида манзилдан 13 дона ишлаб чиқариш ускунаси, 6 дона муҳр, маҳсулотларга яроқлилик муддатини тушириш қурилмалари, 214 минг дона ёзувсиз бўш шиша идиш, 78 минг дона бўш капсула, 503 мингдан ортиқ тайёр дори воситалари ва биологик қўшимчалар ҳамда 105 килограмм номсиз кукун моддалар ашёвий далил сифатида олинган.
Дастлабки ҳисоб-китобларга кўра, мусодара қилинган маҳсулотларнинг умумий қиймати қарийб 5 миллиард сўмни ташкил этади.
Ҳозирда ҳолат юзасидан божхона органлари томонидан терговга қадар суриштирув ишлари олиб борилмоқда.
