Тошкент шаҳар ҳокимига пиёдалар хавфсизлиги бўйича сенатор сўрови юборилди
Бектемир тумани Нурафшон маҳалласида боғча ва мактаб йўқлиги туфайли болалар ҳаёти хавфга қўйилмоқда. Улар Миробод туманидаги таълим муассасаларига бориш учун Тошкент ҳалқа автомобил йўлини кесиб ўтишга мажбур бўляпти. Сенатор ўз сўровида Шавкат Умрзоқовдан кўриладиган чоралар юзасидан ахборот беришни сўраган.
Сенатнинг Мудофаа ва хавфсизлик масалалари қўмитаси раиси Қутбиддин Бурхонов Тошкент шаҳар ҳокими Шавкат Умрзоқовга сўров юборди. Унда Бектемир туман аҳолисини хавотирга солаётган муаммолар тилга олинган.
Хусусан, туманнинг Нурафшон маҳалласида мактабгача таълим ташкилоти ва умумтаълим мактаби йўқлиги туфайли, болалар Тошкент ҳалқа автомобил йўлини мажбуран кесиб, қўшни Миробод туманига қатнаётгани аниқланган.
Сенат ишчи гуруҳи ўрганишлари давомида, Нурафшон маҳалласи Порлоқ кўчасини Миробод тумани Қўйлиқ ота кўчаси билан боғловчи ерости пиёдалар ўтиш йўлагини қуриш бўйича тегишли ишлар олиб борилаётгани маълум бўлган.
“Шу муносабат билан сенатор сўровида мазкур лойиҳа 2026 йил дастурига киритилган-киритилмагани, уни амалга ошириш учун зарур маблағ ажратилгани, маблағ ажратилмаган бўлса, муаммони ҳал этиш бўйича қандай чоралар кўрилаётгани ҳақида маълумот тақдим этиш сўралган”- дейилади ахборотда.
Шунингдек, сўровда ушбу йўлак фойдаланишга топширилгунга қадар вақтинчалик пиёдалар ўтиш жойи ташкил этиш, светофор ўрнатиш ёки йўл-патрул хизмати ходимларининг доимий назоратини йўлга қўйиш юзасидан батафсил ахборот бериш қайд этилган.
