Тошкентдан Гуанчжоуга учаётган самолётни чақмоқ урди
Ҳодисадан сўнг самолёт техник кўрик ва таъмирлаш ишлари учун фойдаланишдан чиқарилган.
Centrum Air авиакомпанияси Тошкент–Гуанчжоу–Тошкент йўналишидаги рейслардан бирининг кечикишига самолётга чақмоқ урилгани сабаб бўлганини маълум қилди.
Авиакомпания матбуот хизматига кўра, 16 май куни амалга оширилган С6511D/С6512D “Тошкент – Гуанчжоу – Тошкент” рейси аввалги парвоз давомида самолётга чақмоқ урилгани сабабли сезиларли даражада кечиктирилган.
Қайд этилишича, ҳодисадан сўнг ҳаво кемаси дарҳол фойдаланишдан чиқарилиб, комплекс техник кўрик, диагностика ҳамда зарур таъмирлаш ишлари учун юборилган.
Текширув якунларига кўра, авиакомпания мазкур йўналишдаги рейсни бошқа самолёт орқали амалга оширишга қарор қилган.
Шунингдек, компания мажбурий кутиш даврида барча йўловчилар меҳмонхонага жойлаштирилгани ва кунига уч маҳал овқат билан таъминланганини билдирган.
Янгиланган парвоз жадвалига кўра, С6512D Гуанчжоу–Тошкент рейси 18 май куни маҳаллий вақт билан соат 20:25 да жўнаб, Тошкентга 00:50 да етиб келиши режалаштирилган.
