Сурхондарёда 13 ёшли қиз дарёга чўкиб кетди
Денов туманидан оқиб ўтувчи Тўпаланг дарёсидан қизнинг жасади топилган.
Сурхондарёда вояга етмаган қизнинг дарёга оқиб кетиши билан боғлиқ ҳолат юзасидан терговга қадар текширув ҳаракатлари олиб борилмоқда.
Вилоят прокуратураси маълумотига кўра, Сариосиё тумани «Афросиёб» маҳалласида яшаган, 2012 йилда туғилган вояга етмаган Ф.М.нинг Тўпаланг дарёсига оқиб кетгани юзасидан туман прокуратураси томонидан текширув тайинланган.
Дастлабки маълумотларга кўра, жорий йилнинг 15 май куни қизнинг жасади Денов тумани «Иттифоқ» маҳалласи ҳудудидан оқиб ўтувчи Тўпаланг дарёсидан тан жароҳатларисиз топилган.
Суд-тиббий экспертизасининг дастлабки хулосасида марҳуманинг ўлимига юқори нафас йўлларининг сув билан беркилиши ва механик асфикция сабаб бўлгани қайд этилган.
Ҳозирда ҳолат юзасидан туман прокуратураси томонидан терговга қадар текширув ҳаракатлари давом эттирилмоқда.
