Афғонистонда оилалар тирик қолиш учун қизларини сотишга мажбур бўлмоқда — BBС
БМТ маълумотларига кўра, бу йил Афғонистонга ажратилган гуманитар ёрдам ҳажми ўтган йилга нисбатан қарийб 70 фоизга камайган.
BBС хабарига кўра, Афғонистоннинг марказий Ғор вилоятида кучайиб бораётган гуманитар инқироз айрим оилаларни тирик қолиш учун қиз фарзандларини сотишга мажбур қилмоқда.
Хабарда айтилишича, узоқ давом этаётган қурғоқчилик, ишсизлик даражасининг юқорилиги ва халқаро ёрдамнинг кескин камайиши сабаб мамлакатнинг кўплаб ҳудудларида оғир иқтисодий вазият юзага келган. БМТ маълумотларига кўра, Афғонистон аҳолисининг қарийб 75 фоизи асосий эҳтиёжлардан маҳрум бўлиб, миллионлаб одамлар очлик хавфи остида яшамоқда.
Ғор вилоятининг маркази Чағчарон шаҳрида юзлаб эркаклар ҳар куни вақтинчалик иш топиш умидида тўпланишади. Бироқ иш ўринлари жуда камлиги сабаб кўпчилик оилалар кунлик озиқ-овқатни ҳам таъминлай олмаяпти.
Маҳаллий аҳоли вакилларининг BBC'га билдиришича, айрим оилалар болаларини боқиш, қарзларини ёпиш ёки касал фарзандларини даволатиш учун қизларини бошқа оилаларга беришга мажбур бўлмоқда. Фуқаролардан бири болаларига нон топиб бера олмаётганини айтса, яна бири фарзандининг операцияси учун маблағ топиш мақсадида қизини қариндошига берганини билдирган.
Шунингдек, репортажда Толибон томонидан аёллар таълими ва меҳнат фаолиятига қўйилган чекловлар ҳам вазиятни янада оғирлаштиргани қайд этилган.
БМТ маълумотларига кўра, бу йил Афғонистонга ажратилган гуманитар ёрдам ҳажми ўтган йилга нисбатан қарийб 70 фоизга камайган. АҚШ ва бошқа йирик донор давлатлар молиявий кўмакни сезиларли даражада қисқартирган.
Мамлакатдаги тиббиёт муассасалари ҳам оғир аҳволда қолмоқда. Шифокорлар дори-дармон ва озиқ-овқат етишмаслиги сабаб янги туғилган чақалоқлар орасида ўлим кўрсаткичлари ошаётганини билдирган.
