Франция Исроил миллий хавфсизлик вазирига мамлакатга киришни тақиқлади
Бу қарорга Итамар Бен-Гвирнинг “Global Sumud Flotilla” фаолларини мазах қилгани сабаб бўлган.
Франция Исроилнинг миллий хавфсизлик вазири Итамар Бен-Гвирга мамлакат ҳудудига киришни тақиқлади. Бунга “Global Sumud Flotilla” фаолларига нисбатан қилган масхараомуз ҳаракатлари сабаб бўлган. Бу ҳақда Al Jazeera хабар берди.
Франция ташқи ишлар вазири Жан-Ноэл Барронинг маълум қилишича, қарор Бен-Гвир томонидан флотилия иштирокчилари — Франция ва Европа фуқароларига нисбатан “қабиҳ муносабат” намойиш этилгани ортидан қабул қилинган.
"Бугундан бошлаб Итамар Бен-Гвирга Франция ҳудудига кириш тақиқланди", дея ёзган Баррон.
Аввалроқ Бен-Гвир ижтимоий тармоқларда Ашдод портида кўзлари боғланган ва қўллари кишанланган ҳолда тиззалаб ўтирган фаоллар устидан кулаётган видеосини эълон қилганди. Исроил ҳарбий-денгиз кучлари бу ҳафта Кипр яқинидаги халқаро сувларда флотилия кемаларини тўхтатиб, қарийб 430 кишини қўлга олган эди.
Фаолларнинг пол бўйлаб судраб олиб кетилгани акс этган тасвирлар ортидан Франция, Италия, Нидерландия, Канада ва Испания Исроил элчиларини чақириб, ҳодисани қоралади.
Баррон Франция фуқароларининг таҳдид ва зўравонликка дучор этилишига тоқат қилиб бўлмаслигини билдириб, Европа Иттифоқини ҳам Бен-Гвирга қарши санкциялар жорий этишга чақирди.
Аввалроқ “Global Sumud Flotilla” ташкилотчилари Исроил ҳибсидан озод этилган фаоллар камида 15 та жинсий зўравонлик ҳолати ҳақида маълум қилганди. Улар орасида камситувчи тинтувлар, жинсий таҳқирлаш ва зўрлаш ҳолатлари борлиги айтилмоқда.
БМТ бу хабарлардан жиддий хавотир билдирган. Исроил қамоқхона хизмати эса барча айбловларни рад этиб, уларни “ёлғон ва асоссиз” деб атаган.
