ИИВ Қўқондаги 10 ёшли қизнинг ўлимига сабаб бўлган ЙТҲ юзасидан қўшимча маълумот берди
9-синф ўқувчиси бўлган вояга етмаган ҳайдовчи йигит бобосига тегишли “Маlibu-2” автомобилини ювиш мақсадида олиб чиқиб кетган.
Ички ишлар вазирлиги Қўқон шаҳрида 10 ёшли уч нафар қизалоқни “Маlibu-2” русумли автомобиль уриб юборган йўл-транспорт ҳодисаси юзасидан қўшимча тафсилотларни маълум қилди.
Маълум қилинишича, ҳодиса 20 май куни соат 16:30 лар атрофида Қўқон шаҳрининг Амир Темур кўчасида содир бўлган. 9-синф ўқувчиси бўлган вояга етмаган йигит бобосига тегишли “Маlibu-2” автомобилини ювиш мақсадида олиб чиққан.
ИИВ маълумотига кўра, у автомобилни бобосининг рухсати билан олган. Тажрибасиз ҳайдовчи ҳаракат давомида пиёдалар ўтиш жойидан кесиб ўтаётган уч нафар 3-синф ўқувчисини уриб юборган.
Йўл-транспорт ҳодисаси оқибатида қизалоқлардан бири воқеа жойида вафот этган. Яна икки нафар вояга етмаган қиз турли даражадаги оғир тан жароҳатлари билан шифохонага ётқизилган. Улардан бири реанимация бўлимига жойлаштирилгани билдирилган.
Видеорепортажда вояга етмаган йигит ҳайдовчилик гувоҳномаси бўлмаганини маълум қилган. Унинг айтишича, у тенгдошлари билан айланиш мақсадида автомобилни бошқарган.
Автомобиль эгаси бўлган бобоси эса калитни неварасига машинани ювиб қўйиш учун берганини, бироқ унинг автомобилни миниб кетганидан бехабар бўлганини айтган.
Мазкур ҳолат юзасидан Жиноят кодексининг 266-моддаси билан жиноят иши қўзғатилган. Шунингдек, ИИВ томонидан 267-модда — транспорт воситасини олиб қочиш ҳолати бўйича ҳам иш очилгани маълум қилинди.
Ҳозирда вояга етмаган ҳайдовчи процессуал тартибда ушланган бўлиб, тергов ҳаракатлари давом эттирилмоқда.
