“Икки стул орасида ўтиришга уринган одам қаттиқ йиқилади”: Медведев Пашинянни огоҳлантирди

Россия Хавфсизлик кенгаши раиси ўринбосари Дмитрий Медведев Арманистон бош вазири Никол Пашиняннинг Европа Иттифоқи билан яқинлашув сиёсатини танқид қилиб, бу мамлакат учун жиддий оқибатларга олиб келиши мумкинлигини билдирди. Бу ҳақда РБК ёзмоқда.

 

Медведевнинг фикрича, Ереван бир вақтнинг ўзида ҳам Евроосиё иқтисодий иттифоқидаги (ЕОИИ) имтиёзларни сақлаб қолиш, ҳам Европа Иттифоқи билан алоқаларни чуқурлаштиришга уринмоқда.

 

“Икки стул орасида ўтиришга уринаётган одам қаттиқ йиқилиши мумкин”, — деб ёзди у “Макс” платформасидаги каналида.

 

Россиялик сиёсатчи Арманистон ҳукумати Россия газининг амалдаги нархларини сақлаб қолишга умид қилаётганини ҳам қайд этди. Унинг айтишича, ҳозир Россия Арманистонга газни минг куб метрига 177,5 доллардан етказиб бермоқда, ҳолбуки Европада 2026 йил май ойидаги биржа нархлари 570–590 доллар атрофида бўлган.

 

Медведев Европа газ нархларига ўтилса, бу Арманистон ичида жиддий норозилик келтириб чиқариши мумкинлигини таъкидлади.

 

Аввалроқ Россия Давлат думаси спикери Вячеслав Володин ҳам Пашинян сиёсатини “Россияга нисбатан дўстона бўлмаган сиёсат” деб атаган эди. Унга кўра, Москва Арманистонга газни ўзи учун зарарли шартларда етказиб бермоқда.

 

Сўнгги ойларда Арманистон Европа Иттифоқи билан яқинлашув сиёсатини фаоллаштирди. Мамлакат расмийлари ЕИга аъзо бўлиш истагини билдирган, шунингдек, Коллектив хавфсизлик шартномаси ташкилотидаги иштирокини тўхтатган.

 

5 май куни Ереванда Арманистон ва Европа Иттифоқи ўртасидаги илк икки томонлама саммит бўлиб ўтди.

 

Апрель ойида Россия президенти Владимир Путин Никол Пашинян билан учрашувда Арманистон бир вақтнинг ўзида ҳам Европа Иттифоқи, ҳам Евроосиё иқтисодий иттифоқи (ЕОИИ) доирасида тўлиқ иштирок эта олмаслигини билдирган.