Рубио АҚШ, Украина ва Россия ўртасидаги музокаралар тўхтаганини маълум қилди
АҚШ Давлат котиби Вашингтон самарасиз музокараларда қатнашишдан манфаатдор эмаслигини билдирди.
АҚШ Давлат котиби Марко Рубио Швецияда бўлиб ўтган НАТО ташқи ишлар вазирлари учрашуви давомида АҚШ, Украина ва Россия ўртасидаги уч томонлама музокаралар ҳозирча амалда мавжуд эмаслигини маълум қилди.
Унинг таъкидлашича, аввал Россия ва Украина фақат АҚШ воситачилигида музокара олиб боришга тайёр бўлган. Шу сабабли Вашингтон жараёнга жалб қилинган, бироқ музокаралар кутилган натижани бермаган.
Рубио АҚШ зарур ҳолатда воситачиликни давом эттиришга тайёрлигини билдирар экан, самарасиз музокараларда иштирок этишдан манфаатдор эмаслигини ҳам қайд этган.
Шунингдек, АҚШ Давлат котиби Вашингтон Украинани қўллаб-қувватлаш сиёсатини давом эттиришини таъкидлаган.
Баёнотда АҚШнинг Европадаги ҳарбий иштироки масаласига ҳам тўхталиб ўтилган. Рубио Қўшма Штатлар ўзининг глобал ҳарбий жойлашувини қайта кўриб чиқаётганини ва Европадаги Америка ҳарбий кучлари сони босқичма-босқич камайтирилиши мумкинлигини айтган.
Унинг сўзларига кўра, бу қарор сиёсий эмас, балки стратегик ва техник омиллар билан боғлиқ. Шу билан бирга, НАТО тасарруфидаги айрим АҚШ қўшинлари сони ҳам қисқартирилиши мумкин.
Рубио Эрон билан боғлиқ вазият юзасидан ҳам фикр билдириб, АҚШ Покистон воситачилигидаги музокараларда айрим ижобий силжишларга эришганини, бироқ якуний мақсадларга ҳали эришилмаганини қайд этган.
