Трамп синглисига суиқасд режлаштирган ироқлик қўлга олинди

 

New York Post манбаларига таяниб хабар беришича, Ироқ фуқароси бўлган Муҳаммад Багир Саад Дауд ас-Саади Доналд Трампнинг қизи Иванка Трампга қарши суиқасд уюштиришни режалаштирганликда гумон қилинмоқда.

 

Маълум қилинишича, 32 ёшли Муҳаммад ал-Саади 15 май куни Туркия ҳудудида қўлга олинган ва кейинчалик АҚШга экстрадиция қилинган. АҚШ расмийлари унинг Ҳизбуллоҳ бригадалари ҳамда Ислом инқилоби қўриқчилари корпуси билан алоқадор эканини тахмин қилмоқда.

 

Тергов маълумотларига кўра, гумондор 2020 йилда Қосим Сулаймонийнинг Бағдодда ўлдирилиши учун қасос олиш мақсадида Иванка Трампни нишонга олишни режалаштирган. Генерал Сулаймоний АҚШнинг махсус амалиёти давомида йўқ қилинган эди.

 

Нашр ёзишича, Муҳаммад ал-Саади ўзининг режалари ҳақида аввал ҳам ижтимоий тармоқларда очиқ ишоралар берган. Хусусан, 2021 йилда у Иванка Трамп ва унинг турмуш ўртоғи Жаред Кушнер яшайдиган ҳудуд акс этган Флорида харитасини эълон қилган. Постда “Ҳозир кузатув ва таҳлил босқичидамиз. Қасос — вақт масаласи” деган мазмундаги ёзув ҳам бўлгани айтилмоқда.

 

Шунингдек, манбаларга кўра, гумондорда Иванка Трампнинг яшаш манзили ва уй чизмалари билан боғлиқ материаллар ҳам бўлган. У Ироқнинг расмий паспортидан фойдалангани сабабли бир қатор давлатларга эркин кириб-чиқиш имконига эга бўлгани қайд этилган.

 

АҚШ Адлия вазирлиги маълумотларига кўра, Муҳаммад ал-Саади Европа ва АҚШ ҳудудларида содир этилган қатор ҳужумлар ҳамда ҳужумларга уринишларда ҳам гумон қилинмоқда. Жумладан, Амстердамдаги банк биносига ўт қўйиш, Торонтодаги АҚШ консуллиги яқинидаги отишма ва Лондонда икки яҳудийга пичоқ билан ҳужум қилиш ҳолатлари тергов доирасида ўрганилмоқда.

 

Ҳозирда мазкур иш юзасидан кенг кўламли тергов ҳаракатлари давом эттирилмоқда.