Қурбон ҳайити арафасида Тошкент автовокзалидан 55 та қўшимча рейс йўлга қўйилди
Йўловчилар сонидан келиб чиқиб, қўшимча рейслар сони яна оширилиши мумкин.
Қурбон ҳайити арафасида Тошкент автовокзалидан қўшимча автобус рейслари йўлга қўйилди. Бу ҳақда ЙҲХХ ахборот хизмати хабар берди.
Маълум қилинишича, байрам кунлари арафасида йўловчилар оқими кескин ошгани сабаб Тошкентдан Сирдарё орқали воҳа вилоятларига қатновчи автобус йўналишлари сони кенгайтирилган. Ҳозирда мавжуд 65 та доимий йўналишга қўшимча равишда яна 55 та рейс ташкил этилган.
Масъуллар фуқароларга уйидан чиқмаган ҳолда телефон ёки махсус платформалар орқали чипталар мавжудлигини текшириш ҳамда уларни онлайн харид қилиш имконияти яратилганини билдирган. Шунингдек, йўловчилар сонидан келиб чиқиб, қўшимча рейслар сони яна оширилиши мумкин.
Байрам кунлари халқаро аҳамиятдаги автомобиль йўлларида ЙПХ ходимлари кучайтирилган тартибда хизмат олиб боради. Ҳайдовчилар билан ўтказилаётган профилактик тадбирларда эса йўл кира нархларини сунъий оширмаслик, қатнов олдидан етарлича дам олиш ҳамда йўл ҳаракати қоидаларига қатъий амал қилиш масалаларига алоҳида эътибор қаратилаётгани таъкидланган.
Эслатиб ўтамиз, Президент Шавкат Мирзиёев томонидан Қурбон ҳайитини нишонлаш тўғрисидаги қарор имзоланганди. Ҳужжатга кўра, 2026 йилда Қурбон ҳайитининг биринчи куни 27 май — чоршанба кунига тўғри келади.
