Ўзбекистон мерганлари Туркиядаги мусобақада биринчи ўринни эгаллади
Мудофаа вазирлиги жамоаси “Энг илғор мерганлар” мусобақасида кетма-кет учинчи марта олтин медални қўлга киритди.
Ўзбекистон Республикаси Мудофаа вазирлиги ҳарбий хизматчиларидан иборат мерганлар жамоаси Туркияда бўлиб ўтган ВИ Халқаро “Энг илғор мерганлар жамоаси” мусобақасида фахрли 1-ўринни қўлга киритди. Бу ҳақда Мудофаа Вазирлиги матбуот хизмати хабар берди.
Мусобақа жорий йилнинг 10–21 май кунлари Испарта Коммандос Тоғ-ўқув марказида ташкил этилди. Унда 13 давлатдан 24 та жамоа иштирок этган.
Иштирокчилар “Минора ва қайиқдан ўқ отиш”, “Жанговар отиш”, “Юқори аниқликда отиш”, “Тўсиқ ортидан отиш”, “Ҳаводаги вертолётдан отиш”, “Ўзини синаш”, “Тунда номаълум масофаларга ўқ отиш” ҳамда «Сюрприз» каби мураккаб шартлар бўйича ўз маҳоратини намойиш этган.
Қарийб 10 кун давом этган беллашувлар якунига кўра, Ўзбекистон Республикаси Мудофаа вазирлиги ҳарбий хизматчиларидан иборат жамоа хорижий давлатлар армиялари орасида фахрли 1-ўринни эгаллаб, олтин медаль билан тақдирланган.
Таъкидлаш жоизки, Мудофаа вазирлиги жамоаси ушбу мусобақада бешинчи маротаба иштирок этмоқда. 2022–2023 йилларда 2-ўринни, 2024–2026 йилларда эса кетма-кет 1-ўринни қўлга киритиб келмоқда.
