Шаҳрам Ғиёсов профессионал боксда илк бор мағлуб бўлди

Профессионал бокснинг ярим ўрта вазн тоифасида фаолият юритаётган ўзбекистонлик боксчи Шаҳрам Ғиёсов фаолиятидаги илк мағлубиятни қабул қилди. У WBA Regular камари учун англиялик Жек Каттераллга қарши кечган жангда очколар ҳисобига кўра имкониятни бой берди.

 

Мисрнинг Гиза шаҳрида ташкил этилган бокс оқшомида ўтган беллашув тўлиқ 12 раунд давом этди. Ҳакамлар ғалабани 118–109, 119–108 ва 116–111 ҳисоблари билан Кеттераллга берди. Жангнинг биринчи раундида Ғиёсов нокдаун ҳолатига ҳам тушиб қолди.

 

Кеттералл жами 551 та зарбадан 219 тасини аниқ йўллаган ва 40 фоиз самарадорлик қайд этган. Ғиёсов эса 366 та зарбанинг 78 тасини манзилга етказиб, 21 фоиз кўрсаткич билан чекланди. Кучли зарбалар бўйича ҳам англиялик боксчи устунлик қилди — 98 га қарши 55.

 

Шу тариқа, Ғиёсов профессионал фаолиятидаги илк мағлубиятини қабул қилди. Унинг ҳисобида ҳозиргача 17 та ғалаба, шундан 10 таси нокаут билан қайд этилган. Ўзбекистонлик чарм қўлқоп устаси сўнгги бор 2025 йил апрель ойида Франко Окампони тўртинчи раундда нокаутга учратган эди.

 

Бугунги жангги қадар ўзбекистонлик боксчи WBA рейтингида биринчи ўринда қайд этилган бўлса, Каттерал олтинчи поғонада бораётган эди. Ушбу йўналиш чемпиони эса америкалик Роландо Ромеро ҳисобланади.

 

32 ёшли Каттерал (33 ғалаба, 2 мағлубият, 14 нокаут) проф боксдаги 33 ғалабасига эришди. У ўзининг сўнгги жангини 2025 йил ноябрь ойида ўтказиб, Эков Эссуман устидан ишончли ғалабага эришган эди. Англиялик боксчи WBO рейтингида 1-ўринда жойлашган. Ғиёсов эса 11-поғонада қайд этилган.

 

Маълумот учун, ушбу жанг Олександр Усик ҳамда Рико Верҳовен иштирокидаги марказий бокс оқшоми доирасида ташкил этилди.