Эрон билан Обама давридагидек ёмон битим бўлмайди — Трамп
АҚШ президенти Эрон билан эҳтимолий келишув ҳали тўлиқ келишиб олинмаганини маълум қилди.
Доналд Трамп Эрон билан эҳтимолий келишув ҳали тўлиқ келишиб олинмаганини маълум қилди. У бу ҳақда ўзининг Truth Social ижтимоий тармоғидаги саҳифасида баёнот берган.
АҚШ раҳбари музокаралар юзасидан турли тахмин ва танқидлар билдирилаётганига муносабат билдириб, жамоатчиликни “бу масалада ҳеч қандай маълумотга эга бўлмаган танқидчиларга” қулоқ солмасликка чақирган.
“Эрон билан келишув тузилса, бу яхши ва тўғри келишув бўлади. Бу Обама давридаги битим каби эмас. Ўша келишув Эронга катта маблағ ва ядровий қурол сари очиқ йўл берган эди. Бизнинг келишувимиз бунинг акси бўлади. Аммо ҳозирча уни ҳеч ким кўрмаган ва у ҳали тўлиқ келишиб олинмаган”, — деб ёзган Трамп.
Президент, шунингдек, аввалги АҚШ маъмуриятларидан фарқли равишда “ёмон битимлар тузмаслигини” таъкидлаган.
Аввалроқ The New York Times нашри АҚШ ва Эрон музокаралар давомида Ҳормуз бўғозини очиш бўйича принципиал келишувга яқинлашгани ҳақида хабар берган эди.
АҚШ томони бўғоз орқали халқаро юк ташувларини тезкор равишда қайта тиклашни талаб қилаётган бўлса, Эрон санкцияларни бекор қилиш, музлатилган активларни қайтариш ва хавфсизлик кафолатларини олишни талаб қилмоқда.
Музокаралардаги асосий мураккаб масалалардан бири Эроннинг ядровий дастури бўлиб қолмоқда. Вашингтон Теҳроннинг ядровий фаолиятига нисбатан қатъий чекловлар жорий этилишини талаб қилмоқда.
