Ҳормуз бўғозида юк ташувлари 30 кун ичида тикланиши мумкин — Washington Post
Маълумотларга кўра, АҚШ ва Эрон сулҳни 60 кунга узайтириш бўйича келишув лойиҳаси ишлаб чиққан.
Washington Post (WP) нашри юқори лавозимли расмийларга таяниб хабар беришича, АҚШ ва Эрон ўртасида сулҳни 60 кунга узайтириш ҳамда Ҳормуз бўғозини қайта очишни назарда тутувчи келишув лойиҳаси ишлаб чиқилган.
Маълумотларга кўра, тайёрланган ўзаро англашув меморандуми томонларга якуний келишувга эришилгунга қадар вақтинчалик сулҳни узайтириш имконини беради. Шу билан бирга, ҳужжатда Ҳормуз бўғозида миналарни тозалаш ва денгиз йўлларини қайта очиш чоралари ҳам кўзда тутилган.
Газета манбаларига кўра, таклифнинг сўнгги версияси Эрон томонидан тасдиқланиши кутилмоқда. Расмийлар эса ҳозирча ҳеч қандай якуний келишув имзоланмаганини таъкидламоқда.
Шунингдек, ҳужжатда Эрон, АҚШ ва уларнинг иттифоқчилари барча фронтларда ҳарбий ҳаракатларни дарҳол тўхтатиши, Ҳормуз бўғозида юк ташиш ҳажмини 30 кун ичида урушдан олдинги даражага қайтариш бўйича чоралар кўриши назарда тутилган.
Дипломатик манбаларга кўра, келишувга Эроннинг ядровий қурол ишлаб чиқармаслик мажбурияти ҳамда бойитилган уран захираларини келишилган механизм асосида йўқ қилиш масалалари киритилган.
