Путин Тоқаев таклифига биноан Қозоғистонга боради
Ташриф доирасида Россия президенти Қозоғистонда Евросиё иқтисодий форуми ва олий кенгаш йиғилишида иштирок этади.
Владимир Путин Қозоғистон Президенти Қосим-Жомарт Тоқаевнинг таклифига биноан 27–29 май кунлари Қозоғистонга расмий ташриф билан боради.
Қозоғистон Президенти матбуот хизмати маълумотига кўра, ташриф давомида икки давлат раҳбарлари ўртасида музокаралар ўтказилиши режалаштирилган. Унда Қозоғистон ва Россия ўртасидаги кенг қамровли стратегик шериклик ҳамда иттифоқчилик муносабатларининг бугунги ҳолати, савдо-иқтисодий, сиёсий ва минтақавий ҳамкорликни янада ривожлантириш истиқболлари муҳокама қилинади.
Шунингдек, ташриф доирасида 28 май куни Евросиё иқтисодий форуми бўлиб ўтади. Форумда Евросиё иқтисодий иттифоқига аъзо давлатлар раҳбарлари иштирок этиши кутилмоқда. 29 май куни эса Олий Евросиё иқтисодий кенгашининг навбатдаги йиғилиши ўтказилади.
Маълум қилинишича, Путин февраль ойида Тоқаев билан телефон орқали мулоқот чоғида Қозоғистонга ташриф буюриш таклифини қабул қилган. Россиянинг Остонадаги элчиси Алексей Бородавкиннинг таъкидлашича, икки давлат раҳбарлари ўртасидаги мунтазам олий даражадаги ташрифлар анъанавий тус олган.
Эслатиб ўтамиз, май ойи бошида Тоқаев Москвага ташриф буюриб, Ғалаба куни тадбирларида иштирок этган эди.
