13 йилдан бери қидирувда бўлган ўзбекистонлик Нью-Йоркдан депоратация қилинди
У гиёҳвандлик воситалари билан боғлиқ жиноят содир этганликда гумонланмоқда.
Ички ишлар вазирлиги Оператив тергов департаменти АҚШ ҳуқуқни муҳофаза қилиш органлари ҳамда АҚШнинг Тошкентдаги элчихонаси билан ҳамкорликда халқаро қидирувда бўлган шахсни аниқлаш ва Ўзбекистонга қайтариш бўйича амалий ишларни амалга оширди. Бу ҳақда вазирлик матбуот хизмати хабар берди.
Ҳамкорлик натижасида АҚШнинг Нью-Йорк шаҳрида 1989 йилда туғилган Ўзбекистон фуқароси аниқланиб, у тегишли тартибда ҳибсга олинган. Мазкур шахс Ўзбекистон Жиноят кодексининг 276-моддаси 2-қисмида (гиёҳвандлик воситалари, уларнинг ўхшашлари ёки психотроп моддаларни сотиш ниятини кўзламасдан ноқонуний тайёрлаш, олиш, сақлаш ва бошқа ҳаракатлар) назарда тутилган жиноятни содир этганликда айбланиб, 2023 йилдан буён қидирувда бўлган.
Олиб борилган процессуал ва халқаро ҳамкорлик чоралари натижасида у белгиланган тартибда Ўзбекистонга депортация қилинган.
Ҳозирда ички ишлар органлари томонидан жиноят содир этиб, тергов ва суд органларидан яшириниб юрган шахсларни аниқлаш ва уларни жавобгарликка тортиш бўйича халқаро ҳамкорлик доирасидаги тезкор-қидирув тадбирлари давом эттирилмоқда.
