WTA ва Ўзбекистон: туризм соҳасида янги имкониятлар муҳокама қилинди
WTA таркибидаги 260 дан ортиқ туризм ташкилотлари ва компанияларини Ўзбекистондаги лойиҳаларга жалб қилиш ҳамда Ипак йўли тарғиботи тадбирларини ўтказиш келишиб олинди.
“ITB China” халқаро туризм кўргазмаси доирасида Туризм қўмитаси раиси А. Аққулов “Wоrld Tourism Alliance” (WTA) бош котиби Зҳенг Ҳао билан учрашув ўтказди.
WTA туризм соҳасидаги халқаро нодавлат ва нотижорат ташкилот бўлиб, у давлатлар, хусусий сектор ва туризм индустрияси иштирокчилари ўртасида ҳамкорликни кенг йўлга қўйиш бўйича фаолият кўрсатади.
Бугунги музокараларда WTA билан ҳамкорликда Ўзбекистоннинг туристик салоҳиятини халқаро майдонда кенг тарғиб қилиш, жумладан, Самарқанд, Бухоро ва Хива каби тарихий шаҳарларнинг жаҳон туристик маршрутларидаги ўрнини янада мустаҳкамлашга қаратилган янги лойиҳаларни амалга ошириш муҳокама қилинди.
Шу билан бирга, WTA платформаси орқали Ўзбекистонга хорижий инвестициялар ва янги туристик лойиҳаларни жалб этиш имкониятлари ҳам кўриб чиқилмоқда. Экологик туризм, зиёрат туризми ва гастрономик туризм каби йўналишларни халқаро ҳамкорлик асосида ривожлантириш илгари сурилмоқда.
Учрашув якунига кўра, WTA таркибига кирувчи 260 дан ортиқ миллий туризм ташкилотлари, авиакомпаниялар, меҳмонхона тармоқлари ва йирик туризм компанияларини Ўзбекистонда амалга оширилаётган лойиҳаларга кенг жалб қилиш ва биргаликда Ипак Йўли тарғиботига бағишланган тадбирларни амалга оширишга келишиб олинди.
Қайд этилишича, Ўзбекистоннинг глобал туристик ташкилотлар билан алоқаларини кучайтирилиши мамлакатнинг халқаро имижини янада оширади. Бу эса нафақат сайёҳлар оқимини кўпайтириш, балки янги иш ўринлари яратиш ва ҳудудий иқтисодиётни ривожлантиришга ҳам ҳисса қўшади.
