Францияда иммиграцияни уч йилга тўхтатиш таклиф қилинди
2025 йилда мамлакатда рекорд даражадаги 4,5 миллион яшаш рухсатномаси берилган.
Франция адлия вазири Жералд Дарманин мамлакатда иммиграцияга уч йиллик мораторий жорий этишни таклиф қилди. Бу ҳақда у Le Journal du Dimanche нашрига берган интервьюсида маълум қилган.
Вазирнинг таъкидлашича, Франция хорижликларни интеграция ва ассимиляция қилиш борасида ўз “чегарасига етган”. Шу сабабли у иммиграцияни сезиларли даражада чеклаш зарурлигини билдирган.
Дарманин бир қатор қўшимча чораларни ҳам таклиф этган. Жумладан, ишлаш учун яшаш рухсатномасини олган хорижликларнинг қариндошларига оилани бирлаштириш асосида яшаш ҳуқуқи беришни тўхтатиш ҳамда Франция Конституциясини ислоҳ қилиб, иммиграцион квоталарни жорий этиш ташаббусини илгари сурган.
Унинг фикрича, ҳукумат ариза берувчилар сони, уларнинг келиб чиқиши ва малакаси бўйича мустақил равишда чекловлар белгилаш ваколатига эга бўлиши керак.
“Келинг, иммиграцияни тўхтатайлик, чиқариб юборилиши керак бўлганларни депортация қилайлик ва визалар берилишини Франция ҳудудини тарк этиш ҳақидаги қарорларнинг бажарилиши билан боғлайлик”, — деган Дарманин.
Франция Ички ишлар вазирлиги маълумотларига кўра, 2025 йилда мамлакатда рекорд даражадаги 4,5 миллион яшаш рухсатномаси берилган. Бу 2024 йилга нисбатан 3,2 фоизга кўпдир.
Қайд этилишича, ҳар учинчи яшаш рухсатномаси оилани бирлаштириш асосида берилган. Расмий статистикага кўра, Францияда қонуний яшаётган хорижликлар мамлакат катта ёшли аҳолисининг 8 фоизидан ортиғини ташкил этади.
Энг кўп яшаш рухсатномалари Жазоир, Марокаш, Тунис ва Туркия фуқароларига берилган.
