Қирғизистон-Ўзбекистон чегарасида янги чегара пости очилди
Ушбу ҳудуддаги чегарачилар икки давлат чегарасининг 12 кмдан ортиқ қисмини қўриқлайди.
Қирғизистоннинг Баткен вилоятида Ўзбекистон билан чегарада жойлашган “Соғмент” янги чегара пости фойдаланишга топширилди. Бу ҳақда 24.кг хабар берди.
Расмийлар янги чегара пости очилиши давлат хавфсизлигини мустаҳкамлаш ҳамда чегара ҳудудларида барқарорликни таъминлашдаги муҳим қадам эканини таъкидлаган.
Билдирилишича, “Соғмент” чегара постида ҳарбий хизматчилар учун барча зарур шароитлар яратилган. Замонавий талабларга жавоб берадиган казарма қурилиб, хизматни олиб бориш учун керакли инфратузилма билан таъминланган.
Қайд этилишича, ушбу ҳудуддаги чегарачилар Қирғизистон–Ўзбекистон давлат чегарасининг 12 километрдан ортиқ қисмини қўриқлайди.
Шунингдек, шу куни Қирғизистоннинг бошқа ҳудудларида ҳам бир нечта чегара постлари фойдаланишга топширилгани маълум қилинди.
