Ўзбекистонда 2030 йилгача бешта янги сел-сув омбори қурилади
Лойиҳа сел ва тошқин сувларидан самарали фойдаланиш, суғориладиган ерларнинг сув таъминотини яхшилаш ҳамда янги ер майдонларини ўзлаштиришга хизмат қилади.
Ўзбекистонда 2027–2030 йилларда Жиззах, Самарқанд ва Тошкент вилоятларида бешта янги сел-сув омбори барпо этилади. Бу ҳақда Президентнинг “Сел-тошқин сувларидан самарали фойдаланишни таъминлаш чора-тадбирлари тўғрисида”ги қарорида белгиланган.
Қарорга кўра, Жиззах вилоятининг Бахмал туманида Тангатопдисой, Самарқанд вилоятининг Ургут туманида Ғиждувонсой ва Чоштепасой, Қўшработ туманида Оқтепасой ҳамда Тошкент вилоятининг Бўстонлиқ туманида Оқсоқотасой сел-сув омборлари барпо этилади.
Янги омборлар ишга туширилиши натижасида Самарқанд вилоятида 7 минг гектар, Тошкент вилоятида 2 минг гектар ва Жиззах вилоятида 300 гектар ернинг сув таъминоти яхшиланади.
Шунингдек, Самарқанд вилоятида 3,3 минг гектар ва Тошкент вилоятида 300 гектар янги ер майдонларини ўзлаштириш имконияти яратилади.
Республика бўйлаб кичик сув захираларини шакллантириш имконияти мавжуд бўлган 60 та ҳудуд аниқланган. Сел-сув омборларини қуриш орқали баҳор-ёз мавсумида юзага келадиган сел ва тошқин сувларини тўплаш, қишлоқ хўжалиги маҳсулотлари етиштириш ҳажмини ошириш ҳамда янги иш ўринлари яратиш кўзда тутилган.
Қарор билан айрим лойиҳаларни давлат-хусусий шериклик асосида амалга ошириш ҳам белгиланган. Хусусан, Жиззах вилоятидаги Тангатопдисой ва Тошкент вилоятидаги Оқсоқотасой сел-сув омборлари қурилишига хусусий инвесторлар жалб этилади.
Бундан ташқари, сел-сув омборлари ҳудудларида туристик-рекреацион зоналар ва балиқчилик хўжаликларини ташкил этишга рухсат берилади. Улар учун зарур ташқи муҳандислик-коммуникация инфратузилмасини яратиш ишлари давлат бюджети ҳисобидан молиялаштирилади.
