Россия мигрантлар назоратини кучайтирмоқчи
Россия ИИВ хорижий давлатларда миграциягача тайёргарлик марказларини ташкил этиб, мигрантларга мамлакатга киришидан аввал электрон идентификация карталарини беришни режалаштирмоқда.
Россия Ички ишлар вазирлиги меҳнат мигрантларини назорат қилиш тизимини кучайтириш мақсадида миграция ҳаблари тармоғини яратиш ва хорижий фуқароларга Россияга келишидан олдин идентификация карталарини беришни режалаштирмоқда.Бу ҳақда Россия ИИВнинг Фуқаролик ва хорижий фуқароларни рўйхатга олиш масалалари бўйича хизматининг Миграция хавфсизлиги департаменти бошлиғи биринчи ўринбосари Алексей Егоров Халқаро хавфсизлик форумида маълум қилди, дея хабар бермоқда ТАСС.
Егоровнинг сўзларига кўра, хорижий фуқароларни текшириш Россия ҳудудида ташкил этиладиган миграция ҳабларида ҳам, мигрантлар келаётган мамлакатлардаги махсус тайёргарлик марказларида ҳам амалга оширилади.
Янги тизим доирасида мигрантларга электрон ахборот ташувчига эга идентификация карталари берилиши кўзда тутилган. Мазкур карта меҳнат шартномасини тузиш учун асос бўлиб хизмат қилади ҳамда хорижий фуқаро ҳақидаги тўлиқ маълумотларни, жумладан биометрик маълумотларни ҳам ўз ичига олади.
Россия ИИВ вакили ушбу чора-тадбирлар ноқонуний миграцияни қисқартириш, мамлакат ҳудудида ноқонуний яшаётган хорижий фуқаролар сонини камайтириш ва ҳуқуқбузарликлар даражасини пасайтиришга қаратилганини таъкидлади.
Шунингдек, вазирлик ташкил этилган мақсадли танлов асосида ишга жалб қилинадиган меҳнат мигрантлари улушини ошириш ҳамда Россиянинг “анъанавий маънавий-ахлоқий қадриятлари”ни қўллаб-қувватлайдиган хорижий фуқароларни жалб этишга интилаётганини билдирди.
