АҚШ Исроил ва Ливанга янги сулҳ ташаббусини таклиф қилди
Таклифга кўра, Ҳизбуллоҳ ҳужумларни тўхтатади, Исроил эса можаронинг кенгайишидан тийилади.
АҚШ Исроил ва Ливан ўртасидаги кескинликни камайтириш мақсадида янги сулҳ ташаббусини илгари сурди. Бу ҳақда Ахiоs нашри АҚШ расмийларига таяниб маълум қилди.
Хабарларга кўра, АҚШ Давлат котиби Марко Рубио Исроил ва Ливан раҳбариятига можарони юмшатишга қаратилган янги таклиф билан чиққан. Ташаббусга мувофиқ, биринчи босқичда Ҳизбуллоҳ Исроилга қарши барча ҳужумларни тўхтатиши керак. Бунинг эвазига Исроил Байрут йўналишида ҳарбий ҳаракатларни кенгайтиришдан ва вазиятни янада кескинлаштиришдан тийилади.
Манбанинг билдиришича, сўнгги 48 соат давомида Рубио Ливан президенти Жосеф Аун ҳамда Исроил бош вазири Бенямин Нетаняҳу билан телефон орқали мулоқот қилган.
Ахиос манбасига кўра, Ливан президенти мазкур ташаббусни илгари суришга ҳаракат қилган. Бироқ Ливан парламенти спикери Набиҳ Берри Исроил биринчи бўлиб ҳарбий ҳаракатларни тўхтатиши кераклигини билдирган. Шу билан бирга, у Ҳизбуллоҳ сулҳ шартларига риоя қилишига кафолат бера олишини маълум қилган.
