Ходимни пора олмагани учун мукофотлаш ҳуқуқий жиҳатдан нотўғри — Антикоррупция агентлиги
Қонун устуворлигининг таъминланиши ходимларнинг функционал мажбурияти экани билдирилди.
Ҳуқуқни муҳофаза қилувчи органлар ходимларини пора олишдан воз кечгани учун рағбатлантириш тартиби жамоатчилик орасида баҳс-мунозараларга сабаб бўлди. Коррупцияга қарши курашиш агентлиги эса бу борадаги танқидларни асосли деб ҳисоблаб, амалдаги тартибни қайта кўриб чиқиш бўйича ўзгартиришлар тайёрланаётганини маълум қилди. Бу ҳақда Gazeta.uz хабар берди.
Маълум қилинишича, агентлик ҳуқуқни муҳофаза қилувчи органлар ходимларини ўз хизмат вазифаларини бажариши доирасида пора олишдан воз кечганлиги учун моддий рағбатлантиришни ҳуқуқий жиҳатдан номувофиқ деб баҳолашини билдирган.
Агентлик қайд этишича, мазкур масала бўйича жамоатчилик фаоллари томонидан билдирилган эътирозлар асосли деб топилган.
Шу муносабат билан агентлик томонидан ишлаб чиқилган Вазирлар Маҳкамаси қарори лойиҳасида соҳадаги суиистеъмолчилик ва турли талқинларнинг олдини олишга қаратилган қўшимча чекловлар назарда тутилган.
Хусусан, коррупцияга оид ҳуқуқбузарликлар ҳақида хабар берган шахсларни рағбатлантириш тартибини белгиловчи амалдаги низомнинг 6-бандига ўзгартириш киритиш таклиф этилган. Таклифга мувофиқ, рағбатлантириш чоралари ҳуқуқни муҳофаза қилувчи органлар ходимларининг ўз хизмат вазифаларини бажариши билан боғлиқ ҳолатларга нисбатан қўлланилмайди.
“Қонунга бўйсуниш ва пора олмаслик — бу қаҳрамонлик эмас, балки ҳар бир давлат хизматчисининг тўғридан-тўғри мажбуриятидир”, дейилади агентлик баёнотида.
Агентликнинг таъкидлашича, коррупсиявий ҳолатларга қарши курашиш ва қонун устуворлигини таъминлаш мазкур ходимларнинг функционал вазифаларидан бири ҳисобланади. Шу боис бундай ҳолатлар учун алоҳида моддий рағбатлантириш жорий этилиши тўғри ёндашув сифатида баҳоланмайди.
Шунингдек, рағбатлантириш тизими устидан назорат махсус электрон платформа орқали марказлашган тартибда амалга оширилиши режалаштирилаётгани, бу эса бюджет маблағларининг асоссиз сарфланишининг олдини олишга хизмат қилиши қайд этилди.
