Қирғизистоннинг Ўзбекистондаги собиқ элчисининг қизи ҳибсга олинди

 

Қирғизистоннинг Ўзбекистондаги собиқ элчиси, шунингдек аввал қишлоқ хўжалиги вазири бўлиб ишлаган Эмилбек Узоқбоевнинг қизи Меэрим Узоқбоева давлат мулкини хусусийлаштириш жараёнлари билан боғлиқ коррупция гумони асосида ҳибсга олинди. Бу ҳақда 24.kg нашри хабар берди.

 

Мазкур ҳолат Қирғизистонда «75 мактуб» деб номланган кенг кўламли тергов доирасида кўриб чиқилмоқда. Тергов материалларига кўра, иш 30 йил аввал амалга оширилган хусусийлаштириш жараёнларини қайта ўрганишга қаратилган бўлиб, Бишкек шаҳрида жойлашган «Қирғизойилкомок» компанияси фаолияти ҳам текширув остига олинган.

 

Маълумотларда қайд этилишича, ушбу компания акцияларининг 63 фоизи Узоқбоевлар оиласи назоратида бўлиб, 1993 йилда бошланган хусусийлаштириш жараёнида Эмилбек Узоқбоев дастлаб 0,5 фоиз улушни харид қилган. Кейинги йилларда у бошқа акциядорлардан улушларни босқичма-босқич сотиб олиб, компанияда асосий назорат пакетига эга бўлган.

 

Ҳимоя томонининг билдиришича, Меэрим Узоқбоева ўша даврда вояга етмаган (10 ёш) бўлган ва у хусусийлаштириш жараёнларида бевосита иштирок этмаган. Шунингдек, у фақат 2017 йилдан бошлаб компания бош директори лавозимида фаолият юритган.

 

Адвокатнинг таъкидлашича, иш юзасидан бир қатор ҳолатлар ҳуқуқий жиҳатдан баҳсли бўлиб қолмоқда. Унинг сўзларига кўра, айрим ҳолатлар ҳуқуқни қўллаш амалиётида икки хил ёндашув мавжудлигини кўрсатиши мумкин.

 

Шунингдек, ҳимоя томони мазкур ишда коррупцияда гумон қилинаётган айрим шахслар эркинликда қолаётгани, вояга етмаган фарзандлари бор ёлғиз она эса ҳибсга олинганини таъкидлаб, бу ҳолат юзасидан адолатли ва холис ёндашув зарурлигини билдирган.