Эбола ваксинасини ишлаб чиқиш учун 60 миллион доллар ажратилади
Янги Эбола штаммига қарши ваксина бўйича клиник синовлар яқин ойларда бошланиши мумкин.
Эбола вирусининг Бундибугё штаммига қарши ваксина ишлаб чиқишни тезлаштириш мақсадида Эпидемияларга тайёргарлик инновациялари бўйича глобал ташкилот (CЕПИ) томонидан қарийб 60 миллион АҚШ доллари миқдорида маблағ ажратилади. Бу ҳақда Reuters хабар берди.
Мазкур молиялаштириш доирасида ваксина ишлаб чиқиш ва клиник тадқиқотларни жадаллаштириш ишлари амалга оширилади. Маблағлар Модерна компанияси, Оксфорд университети ҳамда Халқаро ОИТСга қарши ваксина ташаббуси (IAVI)га йўналтирилади.
CЕPI раҳбари Ричард Хетчеттнинг маълум қилишича, ваксина устидаги дастлабки синовлар яқин бир неча ой ичида бошланиши мумкин. Шу билан бирга, у клиник жараёнлар мураккаб бўлиши ва хавфсизлик вазияти тадқиқотларга таъсир кўрсатиши мумкинлигини қайд этган.
Ҳозирча Бундибугё штамми учун тасдиқланган ваксина ёки махсус даволаш усуллари мавжуд эмас. Мутахассислар янги ваксина ишлаб чиқилиши эпидемиологик хавфларни камайтиришда муҳим аҳамият касб этишини таъкидламоқда.
Африка Касалликларни назорат қилиш ва профилактика марказлари ҳамда Жаҳон соғлиқни сақлаш ташкилоти маълумотларига кўра, Конго Демократик Республикасида 282 та инфекция ҳолати қайд этилган бўлиб, улардан 42 таси ўлим билан якунланган. Угандада эса 9 та ҳолат, жумладан 1 та ўлим қайд этилган.
