Эрон билан келишув келаси ҳафта имзоланиши мумкин — Трамп
АҚШ президенти музокаралар ҳали якунланмаганини, бироқ келишув эҳтимоли юқори эканлигини таъкидлади.
АҚШ президенти Доналд Трамп АBC News телеканалига берган интервюсида Эрон билан музокаралар жараёни якуний босқичга яқинлашаётганини ва яқин кунларда муҳим келишувга эришилиши мумкинлигини маълум қилди.
Трампнинг таъкидлашича, ҳозирда асосий масалалар — сулҳни сақлаб қолиш, минтақавий кескинликни камайтириш ҳамда Ҳормуз бўғозида денгиз юк ташувини қайта тиклаш бўйича келишув ишлаб чиқилмоқда.
“Менимча, биз бу масалада кейинги ҳафта ичида натижага эришишимиз мумкин”, — деган АҚШ президенти.
Давлат раҳбари, шунингдек, Эрон билан тузилиши мумкин бўлган тинчлик келишуви фақат сиёсий эмас, балки стратегик аҳамиятга эга бўлиб, у ҳарбий тўқнашувлардан кўра самаралироқ натижа бериши мумкинлигини қайд этган.
Бироқ Трамп музокаралар ҳали тўлиқ якунланмаганини ва айрим масалалар бўйича келишувга эришиш жараёни давом этаётганини ҳам қўшимча қилган.
