Тожикистонда ҳаво шари қулаши оқибатида 3 киши жароҳатланди, бири Ўзбекистон фуқароси
Болалар куни тадбири давомида кучли шамол оқибатида ҳаво шари назоратдан чиқиб, бинолар устига қулаган.
Тожикистоннинг Хўжанд шаҳрида Болалар куни тадбири доирасида Ўзбекистндан олиб келинган ҳаво шари кучли шамол оқибатида бошқарувдан чиқиб, турар-жой бинолари томларига қулаши натижасида уч киши жароҳат олди. Бу ҳақда Аsiaplus нашри хабар берди.
Ҳодиса 1 июн куни кечки вақтда Камоли Хўжандий театри яқинида қайд этилган. Дастлабки маълумотларга кўра, байрам тадбири ташкилотчилари томонидан ўрнатилган ҳаво шари кучли шамол сабаб бошқарувни йўқотиб, яқин атрофдаги бинолар устига қулаши натижасида хавфли вазият юзага келган.
Маълум қилинишича, жароҳат олганлар орасида Ўзбекистон фуқароси ҳам бор бўлиб, улар тезкор равишда шифохонага етказилган ва уларга зарур тиббий ёрдам кўрсатилган.
Воқеа жойига Фавқулодда вазиятлар хизматлари ҳамда тегишли идоралар зудлик билан етиб бориб, ҳудудда хавфсизлик чораларини кўрган. Дастлабки баҳолашларга кўра, ҳолат фавқулодда вазият эмас, балки кучли шамол оқибатида юз берган бахтсиз ҳодиса сифатида қайд этилмоқда.
Ҳаво шари қулаши натижасида бир нечта уйларнинг том қисмига зарар етган.
