Тошкент вилоятида “Tracker” ҳайдочисидан қарийб 9 кг гашиш топилди
Наркотик моддалар наркокурерлар томонидан қўшни давлатдан Тошкент вилояти ҳудудига контрабанда йўли билан олиб кирилган.
Давлат хавфсизлик хизмати Чегара қўшинлари ҳамда ДХХнинг Тошкент вилояти бўйича бошқармаси ходимлари томонидан ўтказилган тезкор тадбир давомида “Тошкент – Фарғона” йўналишида ҳаракатланаётган “Tracker” русумли транспорт воситаси йўл-патрул хизмати масканида тўхтатилиб, белгиланган тартибда кўздан кечирилган. Бу ҳақда ДХХ Zamon.uz'га хабар берди.
Аниқланишича, автомобилни Фарғона шаҳрида яшовчи, 1990 йилда туғилган ва муқаддам Жиноят кодексининг 166-моддаси (талончилик) билан судланган фуқаро бошқарган. Транспорт воситаси салонини текшириш жараёнида ҳайдовчининг ўз истеъмоли учун сақлаб юрган 1,72 грамм наркотик модда борлиги маълум бўлган.
Қўшимча текширувлар давомида эса автомашина юкхонасидан жами 8 килограмм 913 грамм “гашиш” гиёҳвандлик воситаси аниқланиб, ашёвий далил сифатида мусодара қилинган.
Терговга қадар ўтказилган суриштирувларда мазкур гаркотик моддалар аввалроқ наркокурерлар томонидан қўшни давлатдан Тошкент вилояти ҳудудига контрабанда йўли билан олиб кирилгани ҳамда гумонланувчи томонидан қабул қилиб олиниб, яшаш манзилига олиб кетилаётган бўлгани аниқланган.
Ҳозирда мазкур ҳолат юзасидан жиноят иши қўзғатилгаг.
