Трамп Теҳроннинг оғзаки ваъдаларини етарли эмас деб ҳисобламоқда
АҚШ Эрон билан музокараларда ядровий масалалар юзасидан ёзма кафолатлар талаб қилмоқда.
АҚШ президенти Доналд Трамп Эроннинг ядровий дастури бўйича бераётган мажбуриятларини ёзма равишда расмийлаштириш тарафдори эканини маълум қилди. Бу ҳақда ABC News телеканали манбаларга таяниб хабар берди.
Маълумотларга кўра, Эрон музокарачилари Вашингтонга оғзаки равишда Теҳрон ядровий дастурига оид бир қатор шартларга рози бўлишини билдирган. Бироқ Оқ уйда ўтказилган йиғилишда Трамп ушбу кафолатларни етарли деб ҳисобламаган ва ёзма мажбуриятлар талаб қилган.
Телеканалнинг қайд этишича, АҚШ ва Эрон ўртасида муҳокама қилинаётган ўзаро англашув меморандуми сулҳ муддатини узайтириш, Ҳормуз бўғозида кемалар ҳаракатини босқичма-босқич тиклаш ҳамда Эроннинг ядровий дастури бўйича кейинги музокаралар муддатларини белгилашни назарда тутади.
Манбаларга кўра, томонлар аввалроқ Трамп маъмурияти ва Эрон расмийларини қониқтирадиган келишув лойиҳаси юзасидан дастлабки келишувга эришган. Ҳужжатда Эроннинг ядровий қурол ишлаб чиқармаслик бўйича ёзма мажбурияти акс этган бўлса-да, мамлакат ядровий дастурининг бошқа жиҳатларига оид аниқ талаблар киритилмаган.
Аввалроқ The New York Times нашри Трамп маъмурияти Эрон билан тузилиши мумкин бўлган келишув шартларини янада кучайтириб, Теҳронга янги таклифлар юборгани ҳақида хабар берган эди.
