Ўзбекистон "Ecо Expo Central Asia 2026" доирасида халқаро экологик ҳамкорликни кенгайтирмоқда
Музокаралар давомида кўкаламзорлаштириш, биохилма-хилликни муҳофаза қилиш, чиқиндиларни бошқариш, ҳаво сифатини яхшилаш ва экологик таълимни ривожлантириш бўйича асосий миллий ташаббуслар тақдим этилди.
"Ecо Expo Central Asia 2026" халқаро кўргазмаси доирасида Ўзбекистон Республикаси Президентининг экология масалалари бўйича маслаҳатчиси, Экология ва иқлим ўзгариши миллий қўмитаси раиси Азиз Абдуҳакимов қатор халқаро ташкилотлар ва хорижий идоралар вакиллари билан учрашувлар ўтказди.
Жумладан, Табиатни муҳофаза қилиш халқаро иттифоқи (IUSN) бош директори Гретел Агилар билан бўлиб ўтган музокараларда биологик хилма-хилликни муҳофаза қилиш, табиатга асосланган ечимларни жорий этиш, қўриқланадиган ҳудудларни бошқаришни такомиллаштириш ва экотуризмни ривожлантириш масалалари муҳокама қилинди.
Томонлар биохилма-хилликни сақлаш бўйича янгиланган миллий стратегияни ишлаб чиқиш, Марказий Осиёнинг минтақавий Қизил рўйхатини яратиш ҳамда трансчегаравий муҳофаза этиладиган ҳудудларни ривожлантириш бўйича ҳамкорлик истиқболларини кўриб чиқди.
Шунингдек, IUSN'нинг Тошкентдаги минтақавий офиси билан ҳамкорликни кенгайтириш ва Глобал экологик фонднинг янги дастурлари доирасида қўшма лойиҳаларни амалга ошириш масалалари муҳокама қилинди.
БМТнинг Саноатни ривожлантириш ташкилоти бош директори ўринбосари Фату Ҳайдар билан учрашувда эса “яшил” саноатлаштириш, экологик тоза технологияларни жорий этиш ва саноатни модернизация қилиш йўналишларидаги ҳамкорлик масалалари кўриб чиқилди.
Мулоқот давомида кўкаламзорлаштириш, биохилма-хилликни муҳофаза қилиш, чиқиндиларни бошқариш, ҳаво сифатини яхшилаш ва экологик таълимни ривожлантириш бўйича Ўзбекистонда амалга оширилаётган ташаббуслар тақдим этилди. Шунингдек, энг яхши мавжуд технологияларни жорий этиш, иқлим инновацияларини қўллаб-қувватлаш ҳамда стартапларни ривожлантириш истиқболлари муҳокама қилинди.
Кўргазма доирасида National Geographic Society'нинг илм-фан ва инновациялар бўйича директори Иан Миллер билан ҳам учрашув бўлиб ўтди. Унда Ўзбекистон ва Марказий Осиёнинг табиий меросини халқаро миқёсда тарғиб қилиш, илмий тадқиқотлар, экологик маърифат ҳамда ҳужжатли фильмлар яратиш соҳаларидаги ҳамкорлик масалалари кўриб чиқилди.
Томонлар Оролбўйи ҳудуди, тоғ ва чўл экотизимларида қўшма илмий экспедициялар ташкил этиш, шунингдек, минтақанинг табиий бойликларини тарғиб қилувчи ҳужжатли фильмлар ва рақамли контент яратиш имкониятларини муҳокама қилди.
Шунингдек, Оман Атроф-муҳитни муҳофаза қилиш бошқармаси президенти Абдулла бин Али Ал Амри билан учрашувда чўлланишга қарши кураш, сув ресурсларини бошқариш, чиқиндилар билан ишлаш ва биохилма- асраш бўйича ҳамкорлик истиқболлари муҳокама қилинди.
Ўзбекистон томони "Green University" ҳузуридаги Чўлланишга қарши кураш ва чўл иқтисодиётини ривожлантириш минтақавий тадқиқот маркази базасида қурғоқчиликка чидамли ўсимликлар ҳамда қумларни мустаҳкамлаш технологиялари бўйича қўшма тадқиқотлар олиб боришни таклиф этди.
Расмийларга кўра, мазкур учрашувлар Ўзбекистоннинг экологик дипломатия, барқарор ривожланиш, “яшил” иқтисодиёт ва иқлим кун тартиби йўналишларида халқаро ҳамкорликни кенгайтириш борасидаги саъй-ҳаракатларини намоён этди.
