Трамп Анқарада бўлиб ўтадиган НАТО саммитида қатнашади
АҚШ Давлат котибига кўра, ушбу йиғилиш НАТО тарихидаги энг муҳим саммитлардан бири бўлади.
АҚШ президенти Дональд Трамп июль ойида Туркия пойтахти Анқара шаҳрида бўлиб ўтадиган НАТО саммитида иштирок этади. Бу ҳақда АҚШ Давлат котиби Марко Рубио маълум қилди, дея хабар берди Anadolu нашри.
Рубионинг таъкидлашича, 7–8 июль кунлари ўтказилиши режалаштирилган мазкур саммит альянс тарихидаги энг муҳим учрашувлардан бири бўлиши мумкин.
“Бу ерда аниқлаштирилиши ва ҳал этилиши лозим бўлган қатор масалалар мавжуд. Қўшма Штатлар НАТО аъзоси бўлиб қолмоқда ва биз саммитда иштирок этамиз”, деган Рубио Ваколатчилар палатасининг Ташқи ишлар қўмитасидаги чиқиши давомида.
Давлат котиби НАТО фаолиятида муайян ислоҳотлар ва ўзгаришлар зарурлигини қайд этиб, ушбу масалалар Анқарадаги саммитнинг асосий мавзуларидан бири бўлишини билдирган.
Учрашув давомида альянснинг келажакдаги стратегияси, аъзо давлатларнинг мажбуриятлари ҳамда хавфсизлик соҳасидаги ҳамкорликни такомиллаштириш масалалари муҳокама қилинади.
