Ўзбекистон коррупциялашган давлатлар рейтингида нечанчи ўринда?

Transparency International ташкилоти дунё мамлакатларида давлат секторидаги коррупция ҳолатини акс эттирувчи навбатдаги Коррупцияни қабул қилиш индекси (CPI) натижаларини эълон қилди.

 

Ҳисоботга кўра, Ўзбекистон 31 балл тўплаб, рейтингда 124-ўринни эгаллаган. Мамлакатнинг кўрсаткичи аввалги йилларга нисбатан бироз яхшилангани қайд этилган бўлса-да, коррупцияга қарши кураш соҳасида ҳали ҳам қатор муаммолар сақланиб қолмоқда.

 

Марказий Осиё давлатлари орасида энг юқори натижани Қозоғистон қайд этди. Мамлакат 38 балл билан 96-ўриндан жой олди. Қирғизистон 26 балл билан 142-ўринни, Тожикистон 19 балл билан 166-ўринни, Туркманистон эса 17 балл билан 167-ўринни эгаллади.

 

Тадқиқотда мамлакатларга 0 дан 100 гача бўлган шкала асосида баҳо берилган. Индексда 0 балл коррупциянинг юқори даражасини, 100 балл эса давлат секторининг коррупциядан деярли холи эканини англатади.

 

Ҳисоботга кўра, дунё бўйича ўртача кўрсаткич 42 баллни ташкил этган. Мамлакатларнинг учдан икки қисмидан кўпроғи ушбу даражадан паст натижа қайд этган.

 

Рейтингнинг юқори поғоналаридан Дания 89 балл билан жой олди. Шунингдек, Финляндия (88 балл), Сингапур (84 балл), Янги Зеландия ва Норвегия (81 баллдан), Швеция (80 балл) энг паст коррупция даражасига эга давлатлар сифатида қайд этилган.

 

Рўйхатнинг энг қуйи қисмида эса узоқ йиллардан буён қуролли можаролар ва сиёсий беқарорликни бошдан кечираётган давлатлар жой олган. Энг паст натижани Жанубий Судан қайд этиб, 9 балл билан 181-ўринни эгаллаган.

 

Transparency International экспертлари суд ҳокимиятининг мустақиллиги етарли даражада таъминланмагани ва демократик институтларнинг заифлиги коррупциянинг сақланиб қолишига таъсир этаётган асосий омиллардан бири эканини таъкидлаган.