Ўзбекистонда дори воситаларини давлат рўйхатидан ўтказиш бўйича янги талаблар тасдиқланди
Эндиликда дори таркибидаги GMO ва ҳайвон хомашёсидан олинган моддалар ҳақида батафсил маълумот тақдим этилиши шарт бўлади.
Адлия вазирлигида дори воситаларини давлат рўйхатидан ўтказиш учун тақдим этиладиган ҳужжатларга қўйиладиган янги талабларни белгиловчи йўриқнома давлат рўйхатидан ўтказилди. Бу ҳақда “Ҳуқуқий ахборот” Теlegram-канали хабар берди.
Мазкур ҳужжатга кўра, дори воситаларини рўйхатдан ўтказиш ҳужжатлари Инсон учун қўлланиладиган дори воситаларига қўйиладиган техник талабларни уйғунлаштириш бўйича халқаро кенгаш стандартлари асосида тақдим этилади. Янги тартиб Вазирлар Маҳкамасининг 2025 йил 24 ноябрдаги 738-сон қарори билан тасдиқланган низом ижросини таъминлашга қаратилган.
Йўриқномага мувофиқ, агар дори воситасини ишлаб чиқаришда ҳайвон хомашёсидан олинган моддалар қўлланилган бўлса, ҳужжатларда уларнинг таркибида прионлар мавжуд ёки мавжуд эмаслиги аниқ кўрсатилиши шарт.
Шунингдек, дори воситасини тиббиётда қўллаш бўйича йўриқномаларга халқаро талабларга мос ва реклама хусусиятига эга бўлмаган қўшимча маълумотларни киритишга рухсат берилади.
Янги талабларга кўра, дори воситасининг генетик модификацияланган организмлар (GMO) сақлаши ёки улардан олинганлиги ҳақидаги маълумотлар ҳам мажбурий тартибда тақдим этилади.
Бунда генетик модификация тури ва манбаси, қўлланган генетик конструкция ва экспрессия тизими, биологик ҳамда экологик хавфсизлик чоралари, ишлаб чиқариш жараёнида GMO'дан олинган моддалар қўлланилган босқичлар ва генетик хавфсизликка оид ҳужжатлар тўғрисидаги маълумотлар келтирилиши лозим.
