Ўзбекистонга 5 ойда 5,3 миллиондан ортиқ хорижий сайёҳ келди

Ўзбекистонда туризм соҳасини ривожлантириш ва унинг иқтисодиётдаги улушини оширишга қаратилган ислоҳотлар натижасида хорижий сайёҳлар оқими сезиларли даражада ошди, дея хабар бермоқда Туризм қўмитаси.

 

Маълумотларга кўра, 2026 йилнинг дастлабки беш ойида мамлакатга 5 миллион 352 минг нафардан ортиқ хорижий турист ташриф буюрган. Бу кўрсаткич ўтган йилнинг мос даврига нисбатан 1 миллион 148 минг нафарга ёки 27,3 фоизга кўпдир.

 

Жорий йилнинг май ойида эса Ўзбекистонга туризм мақсадида 1,3 миллиондан ортиқ сайёҳ келган.

 

Қайд этилишича, ушбу ўсиш виза тартиб-таомилларининг соддалаштирилиши, визасиз режим жорий этилган давлатлар сонининг ортиши ҳамда электрон виза тизими имкониятларининг кенгайтирилиши билан боғлиқ. 

 

Шунингдек, мамлакатнинг маданий-тарихий мероси, зиёрат, экологик, гастрономик, тиббий ва тоғ туризми йўналишлари халқаро майдонда фаол тарғиб қилинмоқда.

 

Ҳисобот даврида Ўзбекистон томонидан 2 миллиард 244 миллион АҚШ доллари миқдорида туризм хизматлари экспорти амалга оширилган. Бу кўрсаткич туризм соҳасининг иқтисодиётга валюта тушумларини жалб этиш, хизматлар секторини ривожлантириш ва аҳоли бандлигини таъминлашдаги ўрни ортиб бораётганини кўрсатади.

 

Хабарга кўра, сайёҳлар оқимининг ўсиши Ўзбекистоннинг Марказий Осиёдаги энг жадал ривожланаётган туристик йўналишлардан бирига айланиб бораётганини тасдиқламоқда.