Зеленскийнинг мактуби Путинга кейинроқ етказилади — Песков
Кремл Украина президенти томонидан Россия президентига йўлланган очиқ мактуб мазмунидан хабардор эканини тасдиқлади.
Кремл Украина президенти Владимир Зеленский томонидан Россия президенти Владимир Путинга йўлланган очиқ мактуб мазмунидан хабардор эканини маълум қилди. Бу ҳақда Россия президентининг матбуот котиби Дмитрий Песков баёнот берди.
Песковнинг айтишича, Зеленский мактуби Кремлга етиб келган ва у Россия етакчисига кейинчалик тақдим этилади. Унинг қайд этишича, мактуб президент иштирокидаги расмий тадбир давомида эълон қилинган.
Зеленский ўз мурожаатида Россия президенти билан учинчи давлат ҳудудида тўғридан-тўғри музокара ўтказишни таклиф қилган ҳамда жараёнга АҚШ ва Европа давлатларини жалб этиш зарурлигини таъкидлаган эди.
Шу билан бирга, Владимир Путин Санкт-Петербург халқаро иқтисодий форуми доирасида халқаро ахборот агентликлари раҳбарлари билан учрашув ўтказиб, Украина бўйича музокаралар масаласига ҳам тўхталиб ўтган.
Путиннинг таъкидлашича, агар Киев илгари муҳокама қилинган муросаларга рози бўлса, можаро тез орада тинч йўл билан якун топиши мумкин. У Россия томонининг ҳам айрим масалаларда муросага тайёрлигини билдирган.
Шунингдек, Песков агар Зеленский Путин билан учрашишни истаса, у Москвага келиши мумкинлигини таъкидлаган.
