Африкадаги Эбола эпидемияси сўнгги 50 йилдаги энг йирик ўчоқлардан бирига айланди
Конго ва Угандада Эбола билан касалланишнинг 397 та ҳолати тасдиқланган, вирус оқибатида 63 киши вафот этган.
Африка Касалликларни назорат қилиш ва олдини олиш маркази (Africa CDC) Конго Демократик Республикаси ҳамда Угандада давом этаётган Эбола эпидемияси 1976-йилдан буён қайд этилган тўртинчи энг йирик касаллик тарқалиши эканини маълум қилди.
Ташкилот мутахассисларининг таъкидлашича, касалланиш ва ўлим кўрсаткичлари бўйича ушбу эпидемия тарихдаги энг йирик Эбола ўчоқлари қаторидан жой олган. Африcа CДC вазиятни “ўта жиддий” деб баҳоламоқда.
Сўнгги маълумотларга кўра, икки мамлакатда Эбола вируси билан касалланишнинг 397 та ҳолати тасдиқланган. Касаллик оқибатида камида 63 киши вафот этган.
Эпидемиянинг тарқалиш занжирини аниқлаш мақсадида соғлиқни сақлаш хизматлари томонидан қарийб 10 минг нафар контакт шахс назоратга олинган. Шундан 4341 нафари Конго Демократик Республикасида, 5009 нафари эса Угандада қайд этилган.
Мутахассислар эпидемиянинг асосий сабаби сифатида Бундибугё штамми тарқалаётганини қайд этмоқда. Ушбу штаммга қарши ҳозирча тасдиқланган ваксина ёки махсус даволаш усули мавжуд эмас.
Шу сабабли беморларни изоляция қилиш, организм суюқликларини тиклаш, симптоматик даволаш ҳамда оғриқни камайтиришга қаратилган паллиатив ёрдам асосий чоралар сифатида қўлланмоқда.
Африcа CDC маълумотларига кўра, махсус терапиянинг мавжуд эмаслиги эпидемияга қарши курашни мураккаблаштирмоқда ва ўлим ҳолатларини камайтиришда тиббий кузатув ҳамда қўллаб-қувватловчи даволаш муҳим аҳамият касб этмоқда.
