Андижонда вояга етмаган қизни зўрлаган ИИБ ходими ушланди
ИИБнинг вояга етмаганлар масалалари бўйича инспектори 16 ёшли қиз билан жинсий алоқада бўлгани аниқланган.
Андижонда ИИБ ходими вояга етмаган шахсга нисбатан жинсий жиноят содир этгани аниқланди. Бу ҳақда вилоят прокуратураси хабар берди.
Маълум қилинишича, Қўрғонтепа тумани прокуратураси томонидан 2010 йилда туғилган вояга етмаган қизнинг 3 июнь куни яшаш манзилидан чиқиб кетиб, қайтиб келмагани юзасидан терговга қадар текширув ҳаракатлари ўтказилган.
Текширув давомида Андижон вилоят ИИБ вояга етмаганларга ижтимоий-ҳуқуқий ёрдам кўрсатиш маркази инспектори-ижтимоий ходими лавозимида ишлаган С.Б вояга етмаган қизни Андижон шаҳридаги кўп қаватли уйга олиб бориб, у билан жинсий алоқада бўлгани аниқланган.
Мазкур ҳолат юзасидан жорий йилнинг 4 июнь куни С.Бга нисбатан Ўзбекистон Республикаси Жиноят кодексининг 128-моддаси 3-қисми “в” банди билан жиноят иши қўзғатилиб, суднинг тегишли ажрими билан гумонланувчи тариқасида “қамоқ” эҳтиёт чораси қўлланилган.
Ҳозирда мазкур ҳолат юзасидан Қўрғонтепа туман прокуратураси томонидан дастлабки тергов ҳаракатлари олиб борилмоқда.
Қайд этилишича, тергов ҳаракатларининг бориши вилоят прокуратураси томонидан назоратга олинган бўлиб, якунда қонуний қарор қабул қилиниши таъминланади.
