Хоманаий Трамп билан учрашмайди
Теҳрон АҚШ президенти билан Эрон олий раҳбари ўртасида учрашув ўтказилиши режалаштирилмаганини маълум қилди.
Эрон олий раҳбарининг ҳарбий маслаҳатчиси Моҳсен Ризоий Доналд Трамп ва Хоманаий ўртасида учрашув бўлиб ўтиши эҳтимолини рад этди.
Моҳсен Ризоий CNN телеканалига берган интервюсида мазкур масалага изоҳ берар экан, ҳозирги шароитда бундай учрашув режалаштирилмаганини таъкидлаган.
“Бу содир бўлмайди. Ҳозир биз музокараларнинг биринчи босқичидамиз ва жаноб Трамп музокараларни тўхтатиб қўйди. Шу сабабли бундай учрашув бўлмайди”, деган у.
Аввалроқ Доналд Трамп Яқин Шарқдаги вазият юзасидан келишувга эришилган тақдирда Эрон олий раҳбари билан учрашиш эҳтимолини истисно қилмаганди. АҚШ президенти ҳатто томонлар ўртасида мулоқот учун имконият мавжудлигини ҳам қайд этган эди.
Бироқ Эрон томони ҳозирча бундай учрашув масаласи кун тартибида эмаслигини билдириб, музокаралар жараёнининг дастлабки босқичида эканини маълум қилган.
